Tum Job Nahi Doge? Kya Main Berozgar Baithungi?

Nahi. Main berozgar nahi hoon. Main be-lagaam hoon. Main khud mein kaafi hoon.

Tum IT companies mujhe reject kar doge, kisi aur ko hire kar loge. Tumhare liye main sirf ek aur resume hoon… ek aur “resource.” Par mere liye, main sapne, mehnat aur emotions ka ek jinda example hoon.

Mujhe gardening pasand hai. Main dhoop mein khushi se poora din bita sakti hoon. Ped lagaungi. Mitti mein haath dalungi. Environment ko sudhaarungi — kyunki tum toh sirf AC chala ke usse bigaad rahe ho.

Tum office politics mein busy ho, main open sky ke neeche zindagi jee rahi hoon.

Tum Saturday-Sunday ka intezaar karte ho… Par mere liye har din ek fresh start hai.

Mere papa ne ek restaurant isliye khola tha, taaki jab main college jaun, toh keh sakun — "Humne milke kuch banaya hai."

Main IT industry mein isliye aayi thi kyunki wo mera sapna nahi, papa ka bharosa tha. Par ab samajh aaya — corporate dream aur personal peace ek saath nahi chalte.

Mujhe sirf ek remote job chahiye thi, taaki kaam bhi ho jaye aur environment se connection bhi bana rahe.

Par tumne kaha — “fit nahi ho.”

Suno, har ped har mitti mein nahi ugta. Toh main kya karungi?

Main apna jungle ugaoongi.

Salary chhodo, Itna kamaungi ki China jaa kar unke farming techniques seekh kar apne desh ke kisano ke kaam aa sakun.

Tum job mat do. Main khud ka kaam bana lungi. Aur apna impact bhi.